Í gær var tilkynnt um val á Bíl ársins 2020 á Íslandi í húsakynnum Blaðamannafélagsins. Þar kom, sá og sigraði Jaguar I-Pace líkt og svo víða annars staðar. Sigurinn var þó naumari en oft áður en aðeins munaði 26 stigum á fyrstu tveimur sætunum. Jaguar I-Pace hlaut alls 775 stig en bíllinn í öðru sæti, Audi e-Tron fékk 754 stig en hann keppti í sama flokki og I-Pace. Þriðji í röðinni var einnig bíll í flokki rafsportjeppa, en það var hinn nýi Mercedes-Benz EQC, en hann fékk 714 stig. Bílarnir í ár voru í upphafi 28 en var fækkað niður í 18 í forvali. Bílarnir voru svo bornir saman með prófunum í síðustu viku, bæði í Hvalfirði og í Bláfjöllum.
Fyrsta sinn sem keppt er í flokki rafbíla
Litlu munaði einnig í öðrum flokkum í valinu og hvergi minna en í flokki rafbíla. Þar var það borgarbíllinn Kia e-Soul sem hafði sigurinn, en aðeins tíu stigum á undan Hyundai Kona EV, en þessir tveir bílar eru reyndar náskyldir og byggðir á sama undirvagni og með sömu rafhlöðu. Litlu munaði líka á Toyota Corolla og Mazda 3 í flokki smærri fjölskyldubíla þar sem sá fyrrnefndi sigraði með 12 stiga mun. Þetta er í sautjánda skiptið sem Bíll ársins á Íslandi er valinn, en það hefur verið tilkynnt á hverju ári síðan 2001 ef frá eru talin tvö ár skömmu eftir efnahagshrunið. Þar sem valið hér á landi fer fram seint á árinu er valið látið bera ártal næsta árs og fær viðkomandi umboð Stálstýrið svokallaða til geymslu í eitt ár.
Smærri fjölskyldubílar:
- Toyota Corolla 659
- Mazda 3 647
- VW T-Cross 538
Stærri fjölskyldubílar:
- Peugeot 508 710
- Mercedes-Benz B-lína 673
- Yoyota Camry 662
Jepplingar:
- Toyota RAV4 692
- Mazda CX-30 655
- Honda CRV 609
Jeppar:
- SsangYong Rexton 604
- Jeep Wrangler 527
- Suzuki Jimny 462
Rafbílar:
- Kia e-Soul 681
- Hyunda Kona EV 671
- Opel Ampera 640
Rafsportjeppar:
- Jaguar I-Pace 775
- Audi e-Tron 754
- Mercedes Benz EQC 714